Imbes nga mga bulak, sibuyas bombay ang ginhimo nga bouquet sang bride nga si Lyka sang ginkasal kay Erwin sang Enero 21. Bisan ang mga abay sang kasal, sibuyas man ang ila gin-uyatan.
Nahimo ang konsepto bangud sa pag-trending sang pagmahal sang sibuyas sa pungsod.
Suno kay Lyka, isa ka semana antes sang ila kasal, nag-research siya sa social media sang mga designs sang bouquet nga puwede nila makuhaan sang inspirasyon.
Nakita niya ang bouquet nga human sa sibuyas kag may mga dekorasyon man nga bulak kag nadesisyunan niya nga ini man ang mangin konsepto sang iya bouquet sa kasal. Nauyunan man ini sang iya groom.
Isa ka sako nga sibuyas ang nagamit sang ila coordinator para sa bouquet sang bug-os nga entourage.
Magluwas nga nangin unique ang ila nga bouquet, wala pa nauyang ang ila nagasto tungod puwede pa nila magamit ang mga sibuyas pagkatapos.
Mas nakakinot man sila tungod P8,000 lang ang ila nagasto para sa isa ka sako nga sibuyas. Mas manubo ini sang sa P15,000 nila nga budget para sa mga bulak nga gamiton kuntani.
