GUIMARAS— Patay ang mag-asawa nga senior citizen sang ginpangbuno sang ila umagad sa Sitio Ilawod, Brgy. Aguilar, San Lorenzo ginabanta las-9 kagab-i, Hulyo 14.
Ginkilala ang mga biktima kanday Jose kag Estelita Casamayor, pareho nga 68-anyos.
Suspek sa pagpangbuno ang ila umagad nga si Raymund Quingan, 39-anyos.
Bata sang mga biktima ang asawa sang suspek nga napatay na sang Abril 2024.
Suno kay Captain Joje Gania, officer-in-charge sang San Lorenzo Municipal Police Station, antes ang insidente, nag-inom-inum ang suspek kag nagtiner sa balay sang mga biktima ang tatlo niya ka bata nga babaye.
Sa pagpangusisa sang pulis, nagatambay ang mag-asawa nga biktima sa tiyangge malapit sa ila balay, upod ang tatlo ka kabataan sang suspek. Ginabanta 10-15 meters ang kalayuon sang tiyangge sa balay sang mga biktima.
Nag-abot nga hubog ang suspek kag ginhagad niya pauli ang mga bata pero wala nag-upod sa iya.
Tungod sini, nagpauli ang suspek sakay sa iya motorsiklo kag nagbalik nga may dala na nga kutsilyo tubtob ginpangbuno ang mag-asawa nga tigulang.
12 ka buno ang naagum sang babaye samtang apat ka buno ang naagum sang lalaki, suno sa pulis.
Kalabanan babaye ang tawo sa palibot gani wala na nakabulig sa mga biktima.
Base sa imbestigasyon sang pulis, kalain sang buot ang motibo sa pagpangbuno sang suspek sa mag-asawa tungod permi siya ginasaway sa iya ginapangdala nga mga karelasyon. — Source: Aksyon Farrah Mae Morano/ARI trainee reporter Decyrrie Diamante
