ILOILO — Napilasan ang manghod sang gintiro sang iya magulang sa Sitio Ikdop, Brgy. Madarag, San Enrique kahapon, Hunyo 18.
Ginkilala ang magulang kay alyas Jomar, 47-anyos kag ang manghod si alyas Rixel, 43-anyos, nga residente sang amo nga lugar.
Suno kay Police Captain Dandy Ilalto, hepe sang San Enrique Municipal Police Station, may natabo nga pagbaisay sa mag-utod samtang naga-inom-inom sang makahulubog nga ilimnon.
Tungod sa wala pag-intindihanay, ginkuha sang magulang ang iya ginataklos nga pusil kag gintiro ang iya manghod, suno kay Ilalto.
Gindala ang biktima sa ospital sa Barotac Viejo pero gin-refer sang ulihi sa West Visayas State University Medical Center (WVSUMC).
Ginpahayag sang suspek nga gintiro niya ang iya manghod tungod ginhanaan siya nga bun-on.
Nagsungka ang suspek sa San Rafael police kag gin-turn over sa San Enrique Municipal Police Station.
