ILOILO — Patay ang 33-anyos nga manug-ihaw sang baboy sang ginbuno sa Brgy. Salacay, Cabatuan kagab-i.
Suno kay Police Captain Aileen Lacrite, officer-in-charge sang Cabatuan Municipal Police Station, papuli na sa ila balay ang biktima nga naga-drive sang angkar-angkar upod ang iya tiyo sang nasugata ang suspek nga nagalakat.
Sa imbestigasyon sang police, nagpamangkot ang biktima sa suspek kon diin siya makadto. Nagsabat ang suspek nga sa dike pero ginpaandaman siya sang biktima nga indi magkadto sa dike tungod dakpon siya sang police, suno kay Lacrite.
Liwat nagsabat ang suspek kon puwede siya makasakay sa angkar-angkar pero nagpamalibad ang biktima.
Ginpahayag sang police nga ginhambalan sang biktima ang suspek nga malakat lang samtang ginasugaan ang dalan.
Nagpanaog ang tiyo sang biktima tungod nakalab-ut na sa ila balay sang naghambal ang biktima nga ginbuno siya.
Gilayon gindala sa ospital ang biktima nga may pilas sa idalum sang wala nga ilok pero napatay samtang ginabulong sa ospital, suno sa police.
Sa hot pursuit operation sang police, nadakpan kaina sang aga ang suspek sa iya balay sa Brgy. Quipot, Janiuay kag detained na sa Cabatuan Police Station.
Lunsay nakainom sang makahulubog nga ilimnon ang suspek kag ang biktima, suno sa police.
Magapangatubang sang kaso nga murder ang suspek. — Aksyon Paula Elambayo
