CAPIZ – Apat ka indibidwal nga ginakabig high-value drug personalities ang naaresto sa drug bust operation sa Brgy. Poblacion Tabuc, Mambusao, Capiz kahapon.
Nagabug-at sang 300 grams ang mga na-recover nga suspected shabu kag naglab-ut sa P2,040,000 million ang standard drug price.
Ginhimo ang operasyon sang Regional Police Drug Enforcement Unit 6 (RPDEU6), upod ang Regional Intelligence Division 6 (RID6), PDEG-Special Operations Unit 6, kag Mambusao Municipal Police Station.
Nagdugay sang masobra isa ka bulan ang intelligence casing, validation, kag surveillance batuk sa main target nga si alyas Jie, 26-anyos kag mga upod nga kanday alyas Koykoy, Teroy kag Hans.
May anum ka live ammunition ang na-recover nga caliber 38 revolver.
Ginpanginbulahan ni PRO6 Regional Director, Police Brigadier General Randulf T Tuaño ang pagka-aresto sa mga subject nga nagapakita sang masangkad kag may dedikasyon nga responsibilidad sang kapulisan sa pagtapna sa illegal nga droga sa rehiyon.
