P3.3 million nga balor sang suspected shabu, pusil na-recover sa drug bust operation sa Balasan; menor-de-edad lakip sa mga nadakpan

ILOILO—Naglab-ut sa P3.3 million nga balor sang suspected shabu ang na-recover sa drug buy bust operation sa Brgy. Balanti-an, Balasan sang Hunyo 1.

Nadakpan sa operasyon kanday alyas Dodoy, 46-anyos sang Brgy. Cano-an, Estancia; alyas Adet, 18-anyos sang Brgy. Nalumsan, Carles; alyas Gang, 25-anyos sang Dagupan City, Pangasinan; kag alyas Nica, menor-de-dad sang Brgy. Cano-an, Estancia.

Sa operasyon sang Balasan Station Drug Enforcement Team, nakumpiskar ang 493 grams sang suspected shabu nga may standard drug price nga P3,352,400.

Luwas diri, na-recover man ang 12-gauge homemade shotgun.

Magapangatubang sa violation sa Republic Act 9165 ukon Comprehensive Dangerous Drugs Act of 2002 kag Republic Act 10591 ukon Comprehensive Firearms and Ammunition Regulation Act.

Gin-turn over naman sa Municipal Social Welfare and Development Office (MSWDO) ang menor-de-edad.

Suno kay Police Colonel Bayani Razalan, director sang Iloilo Police Provincial Office, nagapanawagan ang kapulisan sa publiko nga magpanilag kag i-report ang illegal drug activities sa ila nga area. — Aksyon Farrah Mae Morano