P780,000 nga balor sang illegal nga gina-manufacture nga food products nakumpiskar sa San Dionisio

ILOILO — Arestado ang 44-anyos nga indibidwal sang natukiban nga nagabaligya sang illegal nga gina-manufacture nga cooking oil, soy sauce, vinegar, raw materials, kag iban pa nga

manufacturing equipment sa Barangay Bondulan, San Dionisio.

Ini sang nag-implementar sang search warrant tungod sa violations sa Food and Drug Administration (FDA) Act of 2009, ang Regional Special Operations Group–Regional Intelligence Division 6 (RSOG-RID6), 2nd Iloilo Provincial Mobile Force Company, personnel sang San Dionisio Municipal Police Station, kag Food and Drug Administration Regulatory Enforcement Unit–Visayas Cluster.

Nakumpiskar ang nagkalain-lain nga produkto nga ginalakipan sang 240 ka containers sang unbranded cooking oil; 67 ka containers sang unbranded vinegar; 12 ka containers sang unbranded soy sauce; manufacturing equipment; food-grade raw materials; packaging containers; kag iban pa nga produkto nga nagabalor sang P780,000.

Natukiban nga wala sang License to Operate (LTO) kag Certificate of Product Registration (CPR) nga gin-issue sang Food and Drug Administration sa mga produkto nga gin-manufacture kag gin-store.

Suno kay PRO 6 Acting Regional Director PBGEN Randulf Tuaño, ang madinalag-on nga operasyon nagapakita sang ka-importansya sang coordination sang law enforcement kag regulatory agencies sa pag-protektar sa consumers kag pagpasangkad sang public health standards. — Aksyon Farrah Mae Morano