ILOILO — Arestado ang security guard sang Passi City National High School Sablogon Annex sang ginreklamo nga nanumbag kag nagpanaya sang pusil sa 16-anyos nga estudyante kaina sang aga.
Sa pagpangusisa ni Police Master Sergeant Roderick Larida sang Passi City Police Station, nag-ugat ang insidente sang gulpi lang nagsinggitan kag nagpamuyayaw ang Grade 10 student sa isa pa ka estudyante nga yara sa ibabaw sang school building.
Nagpati ang guwardiya nga siya ang ginasinggitan kag ginabuyayaw sang Grade 10 student nga si alyas Jeren gani ginpalapitan niya ang estudyante.
Pero nagrason si Jeren nga indi ang guwardiya ang iya ginabuyayaw gani nagluntad ang baisay tubtob na-impito kag nasumbagan sang suspek ang estudyante sa lawas kag gintayaan sang pusil.
Sa pagpamangkot sang pulis sa estudyante, gin-athag niya nga nagalango-lango lang siya sa isa ka estudyante. Ginpaidalom na sa counseling ang Grade 10 student.
Yara naman sa kustodiya sang kapulisan ang security guard kag nagapangatubang sang kaso nga paglapas sa Republic Act No. 7610 ukon ang Special Protection of Children Against Abuse, Exploitation and Discrimination Act kag RA 10591 ukon Comprehensive Firearms and Ammunition Regulation Act tungod sa pagpanaya sang pusil.
