Solterito nga nanghaboy sang bato sa mga nagabantay sang jeep sa Ledesma St., City Proper nakakas ang unto sang nakamumo sa center island samtang nagapalagyo sa mga naglagas sa iya

ILOILO CITY — Nagadalagan patabok ang 13-anyos nga solterito gani nakasalawid sa kable kag nakamumo sa center island sa Ledesma Street, City Proper subong nga gab-i.

Suno sa mga traffic aides sa lugar, ginlagas ang solterito sang duha ka mga nagabantay sang jeep nga ginhaboy niya sang bato.

Nagpalagyo ang solterito pero nakasalawid sa kable sa center island.

Nagtupa sa gutter ang sag-ang sang solterito kag nakakas ang iya ngipon.

Ginhatagan sang first aide ang solterito kag gindul-ong papuli sa ila balay sa Tanza Esperanza, City Proper.

Sa impormasyon sang mga traffic aides kag masami nagalabay sa lugar, nakita nila ang solterito nga naga-rugby kag ginahaboy ang mga pispis nga nagahapon sa kable.