Ilongga Domestic Helper, nagpa-uli bangud sa indi ma-agwantahan nga pagmaltrato sang iya amo

Iloilo–Napilitan nga magpauli ang Ilongga domestic helper sa Singapore bisan duha pa lang ini ka bulan sa trabaho.

Suno kay alyas Arlene, Hunyo 19 sang nagpadulong siya sa Singapore para kuntani sa duha ka tuig nga kontrata pero nagpauli subong nga Agosto bangud indi na siya maka-agwanta sa sobra nga trabaho kag pagmaltrato sa iya. Ginpahayag ni Arlene nga magluwas sa balay sang iya amo, nagatrabaho pa gid siya sa balay sang iloy sini kag ginadumilian nga magpakig-istorya sa mga pareho niya nga mga Filipinos.

Mapintas man suno sa iya ang iloy sang iya amo kag masami siya ginasakit. Bangud sini, nagdesisyon na lang si Arlene nga magpauli. Ginpatawag naman ini sang iya local agency nga Aniphil Management and Services Agency agud ma-istoryahan ang iya problema.

Nagalaum si Anga tamdon man sang natungdan nga ahensiya sang gobyerno ang iya problema. (Aine Grace Bravo)