15-storey nga hospital building tukuron sa WVSU Medical Center
ILOILO CITY — Ginpangunahan ni First Lady Liza Araneta-Marcos kag House Speaker Martin Romualdez ang groundbreaking ceremony sang 15-storey hospital building sa West Visayas State University Medical Center (WVSUMC) kahapon, Abril 25.
May kabug-usan nga P3.2 billion nga pondo ang proyekto nga ginpain halin sa 2023 General Appropriation Act.
Base sa project brief sang Deparment of Public Works and Highway (DPWH) 6, may kalaparon ang hospital building nga 42,951 square meters.
Lakip sa mga features sang patindugon nga building ang 10-state-of-the-art operating rooms; may siyam ka mga elevators nga may capacity nga 15 ka indibidwal. May 360 ka mga beds ang amo nga building nga ginabug-usan sang 186 wards, 123 nga private rooms kag 51 beds naman para sa Intensive Care Units.
Ang nasambit nga proyekto, isa sa duha ka state-of-the art health facilities sa pungsod nga napaidalom sa state university.
Suno kay Iloilo City Mayor Jerry Treñas, daku ang mabulig sang ospital sa mga kinahanglanon sang mga Ilonggos kag nagalaum man siya nga matapos gilayon ang proyekto.
Ginpabutyag naman ni House Speaker Romualdez nga ang 15-storey hospital building ang makabulig para sa hospital needs sang mga taga-Visayas kag Mindanao.
Mangin area man ini suno sa iya, sang medical training agud nga masolusyunan ang mataas nga demand sang healthcare professionals sa pungsod.
Magluwas sa nasambit nga mga opisyal kag kay first lady, nagtambong man sang seremonya kanday Iloilo City Congresswoman Julienne Baronda; Iloilo 1st district Congresswoman Janette Garin; 2nd district Congressman Michael Gorriceta; 3rd district Congressman Lorens Defensor; 4th district Congressman Ferjenel Biron: 5th district Congressman Raul Tupas kag Uswag Ilonggo Party-list Representative James Ang.
