Iloilo City Lone District Rep. JamJam Baronda ginpanginwala nga nagatukod sang kaugalingon nga grupo para sa 2025 midterm elections
Nanginwala si Iloilo City Lone District Representative Julienne Baronda nga nagatukod siya sang grupo para sa 2025 midterm elections.
Ginhimo niya ang pahayag pila ka semana ang nakaligad sang “political break-up” nila ni Iloilo City Mayor Jerry Treñas sang gindagdag siya sang alkalde sa ila linyada.
“Paano ako nga magporma [sang grupo] nga ako lang gani isa. I don’t think so nga magpati ang mga pumuluyo sang siyudad sang Iloilo,” suno kay Baronda.
Sa pagkamatuod, suno kay Baronda, wala pa siya sang desisyon kun mapadalagan sa masunod nga eleksyon tungod masako pa siya subong sa pagdala sang mga programa sang national government sa 180 ka mga barangay sa siyudad.
Sang nagligad nga bulan, gindeklarar ni Mayor Jerry Treñas nga natapos na ang alyansa nila ni Baronda tungod mapadalagan ang iya bata nga si Raisa Treñas-Chu sa pagka-kongresista sa masunod nga eleksyon. Samtang, mapa-releect naman ang alkalde kaupod kay Vice Mayor Jeffrey Ganzon.
Sa labing una nga tiun pagkatapos sang “political break-up,” nagtabu-ay ang banas nanday Baronda kag Treñas sa ground breaking ceremony sang 15-storey hospital building sa West Visayas State University Medical Center (WVSUMC).
Suno kay Baronda, wala gid sila mahatagan sang oportunidad ni Treñas nga makasugilanon tungod pareho nga masaku ang ila schedule.
Sa interview naman kay Treñas, ginpahayag niya nga wala man sang problema ang pagkitaay nila sang kongresista. Suno sa iya, nag-beso pa sila nga duha.
Sa obserbasyon sang Aksyon Radyo Iloilo news team, separado ang lamesa nga ginpungkuan sang duha pero nag-updanay man sang nagsugod na ang programa. — via Aksyon Hotline
