Iloilo City: 19 ka resource persons, ipatawag sa isa pa hearing sang Committee on Markets and Slaughterhouse angut sa ginaalegar tuklo-anay sa Iloilo Terminal Market!

By: Jocelyn Gelloagan-Maque

19 ka resource persons ang ipatawag sang Committee on Markets and Slaughterhouse sang City Council nga magatambong sa isa pa hearing sa Pebrero 5 alas 2 sang hapon sa City Hall Building.

Suno kay Commitee on Markets Vice Chairman Kagawad Plaridel Nava, lakip sa 19 ka mga resource persons si Iloilo Terminal Market Accountable Officer Emmalene Diana nga nagbuyagyag sang indi husto nga sistema sa pagpalakat sang merkado.

I-presentar na kontani sang Committee ang ila rekomendasyon sa ginhiwat nga session apang ila ginpakamaayo nga maghiwat sang isa pa ka hearing pagkatapos nagsumiter sang bag-o nga affidavit si Diana.

Nasaad sa affidavit ni Diana nga madamo ang naga-isyu sang resibo sa Iloilo Terminal Market bisan pa nga indi sila otorisado nga accountable officer.