Iloilo City: (UPDATE) Taxi Driver nga Nang-blackmail sang Maestra paagi sa Pagpalapta sa Internet sang Sexy Videos sang Biktima kun Indi Pag-ihatag ang Ginapangayo nga Kuwarta, Ginpasakaan na sang Kaso!

By: Jocelyn Gelloagan-Maque

Ginpasakaan na sang kaso ang taxi driver nga nadakpan sa entrapment operation sang National Bureau of Investigation (NBI) matapos nang-blackmail sang maestra nga palaptahon sa internet ang mga sexy videos sini kun indi pag-ihatag ang gina-demand niya nga kuwarta.

Nadakpan si Marcelo Cercado, 53 anyos sang Barotac Nuevo matapos ginreklamo sa NBI sang 33-anyos nga maestra nga tumandok sang Davao City.

Ginpahayag nga nagkarelasyon ang duha paagi sa internet tubtob nga na-engganyo sang lalaki ang maestra nga magpakita sang iya lawas sa video chat.

Nagpakunu-kuno pa si Cercado nga bataun kag gwapuhon kag ginapadulom ang camera kun mag-chat sila sang maestra.

Ginpahayag nga halin sa P20,000 tubtob sa P250,000 ang gin-demand ni Cercado sa biktima kabangdanan napilitan ini nga magdangop kay Davao City Mayor Rodrigo Duterte kag sa NBI.

Nagpadulong sa Iloilo ang biktima dala ang kuwarta nga gindaho kay Cercado sa Iloilo International Airport.

Likom sa ihibalo sang driver, may upod nga NBI operative ang tagreklamo kabangdanan gindakop ini sa airport mismo.

Narecover man sa iya ang marked money nga gingamit sa entrapment operation.

Sang gin-interview, lunsay naman no comment ang sabat sang amo nga taxi driver.