Tampad nga Driver sang TR taxi, nag-uli sang nabilin nga wallet sang negosyante nga pasahero!

Iloilo City — Gin-turnover ni Frederick Mondeja, driver sang TR taxi ang wallet sang negosyante nga si alyas Nonoy sang Leon nga may unod nga P16,500.

Suno kay Mondeja, nagpangibabaw ang iya katampad bangud sa gintudlo sang tagdumalahan sang TR taxi nga i-ipractice nila ang maayo nga pamatasan sa mga pasahero.

Nagsakay ang pasahero nga si alyas Nonoy halin sa Iloilo Port kag wala natalupangdan nga nahulog ang wallet sang nagpanaug sa atubang sang Jaro Big Market.

Ginpahayag nga natalupangdan pa sang isa ka pasahero nga nagbulos kay alyas Nonoy ang wallet sa idalum sang pulungku-an kag ginhatag kay Mondeja.

Nagapati naman si alyas Nonoy nga ibalik ni Mondeja ang iya wallet. Natalupangdan sini ang maayo nga pamatasan sang driver sa pagsaka niya pa lang sa taxi.

Si Mondeja ang pila lang sa mga taxiu drivers nga nag-turnover sang nabilin nga mga pagkabutang sang ila mga pasahero sa Aksyon Radyo kasubong sang cellphones, wallet  kag mga importante nga papeles. (JoMaque)