Update: DILG Provincial Director Teodora Sumagaysay, magapakigsapol sa mga opisyal sa Maasin agud maresolbar ang indi pagsweldo sa mga empleyado sang munisipyo

Iloilo–Mapakig-dayalogo si DILG Provincial Director Teodora Sumagaysay kanday Maasin Mayor Mariano Malones kag mga miembro sang Sangguniang Bayan angut sa pagpamalibad nga hatagan sang otoridad ang gindesignar nga municipal treasurer nga mangin signatory sa bangko.

Suno kay Sumagaysay, italana niya ang dayalugo sa tion nga mabaton ang sabat sang DILG central office sa problema sang banwa. Kon anu man suno sa iya ang mangin desisyun sang central office, sigurado nga para ini sa kaayuhan sang tanan.

Nag-ugat ang problema sang ginpamatukan sang apat ka miembro sang Sangguniang Bayan ang paghatag sang authority ang bag-o nga municipal treasurer nga si Analyn Amboy, anay municipal accountant. Ini ang rason kon ngaa tubtub subong, wala gihapon naswelduhan ang mga empleyado sang munisipyo.

Nagsuksok sang itom nga bayo ang mga empleyado samtang nagatambong sa regular session sang Sanggunian Bayan kahapon bilang pagpakita sang protesta sa ginpahayag pamulitika sang pila ka SB members. Si Amboy ang asawa sang SB member nga nagaplano magpadalagan sa pagka-bise alkalde sa 2016 elections. (Aine Grace Bravo)