Filing sang Certificates of Candidacy, magasugod subong nga adlaw!

Magasugod subong nga adlaw tubtub sa Oktubre 16 ang filing sang Certificates of candidacy ukon COCs sa mga kandidato sa syudad kag probinsya sang Iloilo para sa 2016 elections.

Akomodaron sang City Comelec Office sa Iloilo Terminal Market ang mga kandidato para sa pagka-mayor, vice mayor, city councilors, kag lone district congressman. Ginpahayag ni City Comelec Assistant Election Officer Jonathan Sayno nga bukas ang ila opisina halin alas-8 sa aga tubtub alas-5 sa hapon para sa pagbaton sang mga COCs. Sang nagligad pa nga semana suno sa iya nagapreparar ang ila talatapan para sa isa ka semana nga COC filing. Ginpahanumdom ni Sayno ang mga kandidato nga temprano pa mag-file sang COC agud malikawan ang pagdinaguso.

Batunon naman sang Provincial Comelec Office sa La Granja, Lapaz ang mga mapadalagan sa pagka-gobernador, bise gobernador, Provincial Board members kag district congressman. Iga-file sang mga mapadalagan sa pagka-municipal mayor, vice mayor, kag Sangguniang Bayan members ang ila COCs sa ila natungdan nga banwa.

Ginpa-athag ni Comelec Provincial Officer Atty. Elizabeth Doronila nga wala na sang extension of hours ang filing sang COC. (Aine Grace Bravo)