Ginpirmahan nga unity covenant nanday Gov. Arthur Defensor kag former Cong. Ferj Biron, wala nagasaad sang suporta sa vice governor candidate sang Liberal Party

Iloilo–Indi na mabag-o ang nasaad sa ginpirmahan nga unity covenant sa tunga nanday Governor Arthur Defensor, provincial chairman sang Liberal Party, kag ni former 4^th District of Iloilo Congressman Ferj Biron, chairman sang Abyan Ilonggo Party.

Gintumod ni Biron ang nahisugtan nga indi pagsuportahan sang Abyan Ilonggo ang kandidato sa pagka-bise gobernador sang LP. Kasunod ini sang sorpresa nga pag-file sang certificate of candidacy ni incumbent 5^th District of Iloilo Congressman Niel Tupas Jr kahapon. Suno kay Biron, maathag sa kasugtanan nga suportahan lang sang Abyan Ilonggo ang mga kandidato sang LP sa pagka-presidente, bise presidente, mga senador kag gobernador.

Wala naman ginakonsiderar suno sa iya sang ila partido nga mag-field sang kandidato sa pagka-bise gobernador kontra kay Congressman Tupas. Indi man maka-komento si Biron sa posibilidad nga masuporta sila pananglitan may i-field nga kandidato ang pamilya Garin. (Aine Grace Bravo)