Lima ka balay, naupos sa sunog sa Zone 10 Calaparan Arevalo

Iloilo City — Sunod-sunod nga sunog ang nagluntad sa syudad halin pa kahapon.

Pinakaulihi dire amo ang sunog sa Zone 10 Barangay Calaparan Arevalo kaina sang aga sa diin 5 ka balay ang totally-damaged.

Ginapanag-iyahan ini nanday Gary Jardeleza, Indang Pastolero, Eugene Santos Sr, Rhodora Chavez lakip na ang Salem Christian Center Prayer House samtang partially-damaged naman ang balay ni Rey Mata.

Ginpahayag nga naghalin ang kalayo sa ibabaw nga parte sang balay ni Gary Jardeleza.

Ginbanta ni City Fire Marshall Jerry Candido sa masobra P500,000 ang balor sang kahalitan sa sunog.

Kahapon sang aga, nasunog ang Longwin Iloilo sa Aldeguer Street, City Proper kag pagka-hapon, nasunog man ang 54 ka mga balay sa Zone 6 Boulevard Molo sa diin 46 ang totally-damaged kag 8 ang partially-damaged samtang isa ang napatay.  (JoMaque)