Temporaryo nga pagpanirado sang Tagbak terminal, nangin kalbaryo sa mga pasahero kag mga motorista!

Iloilo City — (Update) Nangin kalbaryo sang mga pasahero kag iban pa nga motorista nga nagagamit sang Tagbak terminal ang kapaslawan sang Iloilo City Council nga aprubahan ang extension sang franchise kahapon nga kadungan man sang pag-expire sang permit agud maka-operate ang terminal.

Napilitan ang tag-iya sang Tagbak terminal nga si Alberto Ladrido III nga siraduhan anay ang entrance kag exit agud nga wala sang makagamit sang terminal bangud nga wala pa sila sang permit.

Bangud sini, napwersa ang depasahero nga mga jeep, vans kag bus nga i-ula kag magpick-up sang mga pasahero sa guwa sang terminal.

Nagdala ini sang pagpugok sang trapiko bangud sa pagtambay sang mga depasahero nga salakyan sa higad sang karsada.

Sa session sang konseho kahapon, ginduso nanday Councilors Plaridel Nava, Armand Parcon kag Joshua Alim nga aprubahan na kahapon ang renewal ukon extension sang franchise pero ginbotohan nanday councilors Ed Peñaredondo, Day Lee Zulueta-Salazar, Lyndon Acap, Rodel Fullon Agado, Reyland Hervias, Jay Treñas kag R. Leoni Gerochi nga sa masunod nga session lang ipasar ang resolution para sa paghatag sang bag-o nga franchise sa Tagbak terminal.

“First reading pa lang”

Wala sang madakup sa operator sang Tagbak terminal kon maga-operate gihapon ini bisan nga wala na-renew ang franchise.

Pahayag ini ni Councilor Ed Peñaredondo matapos nanirado ang Tagbak terminal bangud nag-expire na ang franchise kahapon.

Ginhalimbawa pa ni Peñaredondo ang Baldoza terminal sa La Paz nga masobra isa ka tuig na nga naga-operate bisan wala sang franchise.

Nagpa-athag naman ang konsehal kon ngaa wala sila nagpasugot nga ipasar kahapon ang proposed ordinance agud mahatagan sang bag-o nga franchise ang Tagbak terminal.

Suno kay Peñaredondo, may rule ang konseho nga kinahanglan mag-agi sa tatlo ka readings ang proposed ordinance antes aprubahan.

First reading pa lang kahapon ang ginhimo suno kay Peñaredondo kag posible nga ipasar nila sa masunod nga session.

Plano naman sang tag-iya nga magpasaka sang kaso sa konseho suno kay Atty. Dan Cartagena, abogado sang operator sang Tagbak terminal nga si Alberto Ladrido III.

Wala gid nagdumdom ang kliyente ni Cartagena nga indi pag-i-extend ang ila franchise bangud madugay na suno sa iya nakapasa sang mga requirements.

Kon ginpasar lang suno kay Cartagena sang konseho ang extension sang franchise, wala gid nanirado ang Tagbak terminal.  (JoMaque)