UPDATE: Proposed Ordinance sa log-in, log-out sang mga taxi drivers, nakapasar sa first reading sa City Council

Iloilo City–Aprubado sa first reading sa City Council ang gina-proponer nga ordinansa ni ex-officio Councilor Reyland Hervias angut sa log-in, log-out sang mga taxi drivers.

Gina-welcome ni Hervias kon may idugang ang iban nga konsehal sa iya gindihon nga ordinansa. Nabutang sa proposed ordinance nga mga barangay tanod/CVO kag personnel sang City government ang maga-duty sa outpost nga hapitan sang mga taxi drivers sa paglog-out kon magbiyahe sa guwa sang syudad kag paglog-out sa pagbalik. Ipatuman ang pagsulundan halin alas-9 sa gab-i tubtob alas-4 sa kaagahon.

11 ka mga lugar naman ang gin-identify sang mga taxi drivers kag operators nga butangan sang outpost. Nahisugtan naman nga ibutang sa logbook ang pangalan sang taxi driver base sa iya driver’s license, taxi company, body number sang taxi unit, ginhalinan kag kadtuan sang pasahero, oras sang pag-exit ukon pagbalik sa syudad kag kon mahimo ang pangalan sang pasahero.

Ginalauman ni Hervias nga suportahan sang iya kaupdanan sa konseho ang proposed ordinance agud mapasar. Nahuman ang proposed ordinance bangud sang sunod-sunod nga mga krimen batuk sa mga taxi drivers sang nagligad nga tuig. (Aine Grace Bravo)