Update: License to Own and Possess Firearm sang kontrobersyal nga negosyante nga si Melvin Odicta alyas Boyet, gin-revoke

Iloilo City — Gin-revoke na ang License to Own and Possess Firearm (LTOPF) sang kontrobersyal nga negosyante nga si Melvin Odicta Alyas Boyet.

Gin-aprubahan sang PNP Firearm and Explosives Office (FEO) ang rekomendasyon sang FEO License Revocation and Restoration Board (FLRRB).

Gin-aprubahan man ang pag-revoke ukon pagkanselar sang registrations sang 12 tanan ka mga pusil ni Odicta.

Napulo ka mga FLRRB members ang nagpirma sang rekomendasyon base sa FLRRB resolution number 2016-073.

Sa senate investigation sang Committee on Public Order and Dangerous Drugs sang Pebrero 2 may kaangtanan sa tuyo nga pagsaka sang grupo ni Odicta sa Aksyon Radyo Iloilo sang nagligad nga tuig, ginkwestyun ni Senador Tito Sotto kon ngaa na-isyuhan sang LTOPF ang negosyante bisan pa nga na-convict ini sang Disyembre, 1989 sa kaso may kaangtanan sa illegal drugs kag ginpamatbatan sang life imprisonment.

Base sa impormasyon nga nakalab-ut sa Aksyon Radyo, Pebrero 1 pa gin-aprubahan ang revocation kag kanselasyon sang LTOPF kag gun registrations ni Odicta pero sang Pebrero 5 lang gin-fax sa Campo Delgado.

Si Odicta ang gintudlo ni PDEA 6 Director Paul Ledesma nga lider sang Odicta Drug Group sa Iloilo. (Nemesio Martirez)