UPDATE: Short circuit, gintudlo nga rason sang sunog sa San Juan, Molo

Iloilo City–Short circuit ang gintumod nga kawsa sang sunog sa Zone 1-b San Juan, Molo nga naglamon sang 59 ka mga balay kahapon.

Pahayag ini ni Fire Officer 3 Rollin Hormina sang Bureau of Fire Protection-Iloilo City. Ginpahayag nga nalunay ang ginsaksakan sang electric fan kag rice cooker sa balay ni Roberto Sedurifa Jr gani nga nagkalayo. Madasig ang paglapta sang kalayo bangud lunsay human sa light materials ang mga balay sa lugar.

Temporaryo nga nagatenir sa San Juan Elementary School ang mga nasunugan kag nagapanawagan sang bulig bangud kalabanan sa ila ang wala gid sang nasalbar nga kagamitan.

Ginabanta sa duha ka milyon ka pesos ang kahalitan sa sunog. (Aine Grace Bravo)