UPDATE: Pulis nga nagtuga sang tension sa hotel sa Jaro kag pulis nga gintudlo nagpatay sang iya hepe sa Janiuay, gindesisyunan sang PRO-6 nga i-dismiss sa serbisyo!

Iloilo City–Pirmado na ang pag-dismiss sa pulis nga nagtuga sang tension sa hotel sa Jaro kag pulis nga gintudlo nagtiro-patay sa iya hepe sa Janiuay.

Suno kay Police Regional Office (PRO) 6 Director PCSUPT Bernardo Diaz, indi dapat pagpamarisan ang mga pulis nga nagamusing kag nagaguba sa Philippine National Police (PNP). Ginkumpirmar ni PSUPT Gilbert Gorero, spokesman sang PRO-6, nga gin-affirm sang mga opisyal nila ang rekomendasyon sang Regional Internal Affairs Office (RIAS) nga nag-imbestigar kanday SPO1 Arnold Lizada kag PO2 Gary Catedral.

Ginhatagan sang 10 adlaw ang duha ka pulis nga mag-apelar halin sa pagbaton sang order nga nagasipa sa ila sa serbisyo.

Si Catedral ang nagpinalupok sang pusil sa sulod sang El Haciendero Hotel sa Jaro samtang si Lizada ang gintudlo nga nagtiro patay sa iya hepe nga si PINSP Christian Nelmida sa kampo sang 2nd Maneuver Platoon sa Barangay Jibolo, Janiuay sang New Year’s Eve sang nagligad nga tuig.

Kaso nga grave misconduct kag conduct unbecoming of a police officer ang ginpasaka kay Catedral samtang grave misconduct naman kay Lizada.