Atty. Dan Cartagena, isahanon nga nagtambong sa 2016 Candidates’ Forum sang Aksyon Radyo Iloilo kag UPV sa Halalan 2016

Iloilo City — Isahanon nga nag-abot sa UPV auditorium si Atty. Daniel Cartagena para magtambong sa una nga hugnat sang 2016 Candidates’ Forum sang Aksyon Radyo Iloilo kag UPV sa Halalan 2016.

Wala nagpakita sa aktibidad ang kasumpong sini nga si incumbent Congressman Jerry Treñas wala sapayan pareho sila nga ginpadal-an sang imbitasyon.

Pareho man nga ginbaton nanday Cartagena kag Treñas ang imbitasyon apang si Cartagena lang ang nagkomiter nga matambong.

Marso 29 sang gab-i, nagpadala sang text message ang kongresista nga indi ini makatambung bangud may meeting siya kaupod ang Liberal Party members sa Manila.

Bangud sini, si Cartagena lang ang nahatagan sang kahigayunan nga magplastar sang iya mga plataporma para sa syudad sang Iloilo.

Isa-isa man sini nga ginsabat ang mga pamangkot sang mga panelist angut sa mga isyu nga dapat hatagan sang pagtamud kon magdaug nga kongresista sa syudad.

Ginplastar ni Cartagena ang iya panindugan sa mga kontrobersyal nga hagna kag laye pareho sang Freedom of Information bill; Anti-Dynasty bill; divorce; same-sex marriage; capital punishment; climate change, SK Reform law kag Reproductive Health law. (JoMaque)