33.7 Million Pesos nga Budget sang Task Force El Niño, Gamiton sa Pagdeklarar sang State of Calamity sa Probinsya

Iloilo–Nakasugtan sang mga miembro sang Sangguniang Panlalawigan nga gamiton ang budget sang Task Force El Niño nga nagalab-ut sa 33.7 milyones pesos kadungan sang pagdeklarar sang state of calamity sa probinsiya bangud sang epekto sang El Niño.

Ang El Niño fund nagasakop sang pito ka mga sectoral areas pareho sang tubig, agrikultura, forest and biodiversity, information and education campaign, health, veterinary kag social capital. Sa special session kahapon, makaduha ka beses nga nag-recess ang mga board members bangud sang mainit nga diskusyon kun diin kuhaun ang pondo.

Ginsuhestyon man sang pila ka mga board members nga i-prioritize nga buligan ang pito ka mga banwa nga una na nagdeklarar sang state of calamity nga ginalakipan sang Dueñas, Sta. Barbara, Estancia, Calinog, Bingawan, Dingle kag Miag-ao. Bangud sa deklarasyon, awtomatiko nga napa-idalum ang 42 ka kabanwahanan kag isa ka component city sa state of calamity. (Aine Grace Bravo)