Kontrata sang Holland Water Refilling Station sa Water Distribution, Ginbawi sang City Government

Iloilo City — Wala gid sang gina-uyatan nga ebidensya si Atty. Mark Piad, spokesman ni Mayor Jed Patrick Mabilog, nga nakadeliver sang tubig ilimnon ang Holland Water Refilling Station sa mga barangay sa syudad nga may water shortage bangud sang El niño.

Ini ang rason suno kay Piad nga nagrekomendar sila ni City Legal Officer Atty. Dan Dinopol nga nagrekomendar sila nga i-rescind ukon bawion na lang ang kontrata sa Holland water nga ginhatag sang Abril 19.

Suno kay Piad, wala siya sang anuman nga data ukon proof nga nakadeliver ang Holland water kag pamatuod diri ang madamo nga reklamo nga ila nabaton halin sa apektado nga mga pumuluyo.

Nagpadala subong nga adlaw si Piad sang sulat sa Holland water agud ipabalo nga bawion sang syudad ang kontrata bangud sa ila kapaslawan nga masunod ang mga kaundan. (JoMaque)