UPDATE: Asawa sang Muslim nga Ginpatay kag Ginsunog sa Jaro, Nagtudlo sa iya mga Himata nga Naghimo sang Krimen

Iloilo City–Naguwa kag nagsaysay sang iya nahibaluan sa krimen ang asawa sang muslim nga ginpatay kag ginsunog sa circumferential road sa Balabago, Jaro sang Hunyo 17.

Ginbuyagyag ni Rosaminda Onday, asawa ni Jalel Baratumo, 34-anyos sang Marawi City, nga anum ka tawo ang nagpatay sa iya bana. Duha sa anum ka mga suspects suno sa iya ang iya utod nga sanday Alex Pamandi kag Kamar Onday. Gintudlo man sini nga involved sa krimen sanday Licky Datu Imam, Aslani Ansari Datu Omam, Ali Basa kag Wahid Agama.

Suno kay Onday, si Licky Datu Imam ang nagtawag sa iya sang Hunyo 16 kag naghambal nga pakadtuon sa Ticud, Lapaz ang iya bana. Sa balay ni Aneesa Agama suno sa iya ginpatay si Jalel. Ang iloy ni Onday ang nagsugid sa iya sang natabo.

Ginbulus-bulusan pa suno sa iya sang mga suspek tiro ang iya bana kag gindala sa circumferential road kag ginsunog. Wala sang nadumduman si Onday nga sala sang iya bana agud patyon sang iya mga himata. (Aine Grace Bravo)