New Lucena Mayor Christian Sorongon, nagpasaka sang kaso batuk sa mag-asawa nga Board Member Liecel Seville kag Rico Seville!

New Lucena, Iloilo–Ginpasakaan ni Mayor Christian Sorongon sang kaso kriminal ang mag-asawa nga Board Member Liecel Seville kag Rico Seville.

Gin-file kahapon sang legal counsel ni Mayor Sorongon sa Iloilo Provincial Prosecutors Office ang kaso nga qualified assault to a public officer kay BM Seville kag duha  ka counts sang usurpation of official functions batuk kay Rico Seville. May kaangtanan ini suno kay Sorongon sa pagsulong sang mag-asawa sa iya opisina sang Agosto 10, 2016 kag gin-rekisa ang iya security gani napuhag ang pila ka empleyado. Nagalaum si Sorongon nga paagi sa pag-file sang kaso, maguwa ang kamatuoran kag mahatagan sang hustisya ang mga biktima sa natabu.

Suno naman kay BM Seville, ginasalbar lang ni Sorongon ang iya kaugalingon sa kahuy-anan bangud una na siya nga nakapasaka sang kaso batuk sa alkalde. Ginkasuhan ni Seville si Sorongon sa Ombudsman sang  grave misconduct kag malversation of public funds. Nakabaton na si Seville sang sulat halin sa Ombudsman nga ginapasabat si Sorongon sa iya ginfile nga kaso.

Ginpahayag ni Seville nga dugang nga kaso ang ginpasaka niya sa alkalde bangud tatlo ka bulan nga wala ginpirmahan ang iya clearance. (AGB)