(UPDATE) Suspek sa pagpatay sa mag-iloy sa Barotac Nuevo, pasakaan sang kaso nga double murder kag frustrated murder

Barotac Nuevo, Iloilo–Kaso nga double murder kag frustrated murder ang ipasaka batuk kay Efren Descutido bangud sa pagbuno patay sa mag-iloy nga Nelly Bretaña kag Lilibeth Bretaña-Silvederio kag pagbuno sa bata ni Lilibeth nga si Jan-Jan sa Barangay Tiwi kahapon.

Suno kay PCINSP Raymond Celoso, hepe sang Barotac Nuevo Police Station, ginapreparar na nila ang pagfile sang kaso batuk kay Descutido nga nagsungka kaina sang kaagahon kag nag-ako sa krimen. Sa imbestigasyon sang police, makaduha ka beses na gin-areglo sang barangay kapitan ang magtimbang nga partido.

Ginpahayag ni Celoso nga base sa panaysayon sang testigo, nagapungko ang mag-iloy sang nagsulod si Descutido kag may pagbaisay tubtob ginbuno sang suspek ang mga biktima.

Una na ginpa-athag sang bata ni Lilibeth nga si Sherwin nga madugay na nga may kaakig ang suspek sa ila pamilya bangud nalaksam ang iya balay sang ginbakal nila nga duta. (AGB)