Rizal, Lapaz Punong Barangay Jolly Peñasales, nadakpan sa buy bust operation; kapitan, nanginwala nga involved sa illegal drugs

Iloilo City–Gindakup sa drug buy bust operation kaina sang hapon si Rizal, Lapaz Punong Barangay Jolly Peñasales.

Suno kay PSINSP Kenneth Bermejo sang Regional Drug Enforcement Unit, nabaklan si Peñasales sang isa ka bulto sang suspected shabu sa balor nga P15,000. May nakuha pa gid sa iya nga apat pa ka bulot sang suspected shabu kag duha ka 9mm nga pusil. Gina-check sang RDEU ang mga papeles sang mga pusil pero gin-ako ni Peñasales nga siya ang nagapanag-iya sang mga ini.

Madugay na nga gina-surveillance si Peñasales suno kay Bermejo kag nataymingan gid sang mga operatiba sa iya balay kaina.

Nanginwala naman si Peñasales nga involved siya sa baligyaanay sang illegal drugs.

Ginpahayag ni Bermejo nga base sa ila source, nagakuha sang drug supply ang kapitan sa Cagayan de Oro kag Negros island. Si Peñasales ang wala nalakip sa narco list ni Presidente Rodrigo Duterte kag drug watchlist sang directorate for intelligence. (AGB)