Drug Suspect Nga Nagtudlo Sa 4 Ka Pulis Nga Drug Protertors Sang Iya Manghod Nga Drug Personality Nagbawi Sang Iya Pahayag

Iloilo City – Nagsorry si drug suspect Gilbert Sumodevilla sa apat ka pulis nga iya una ginhingadlan nga drug protectors sang iya manghod nga si Kenneth nga napatay sa buy bust operation sa Molo sang nagligad nga tuig.

Suno kay Sumodevilla, indi niya kilala sanday PO2 Reynaldo Caro, PO2 Fortunato Moso, PO1 Henson Digon nga preso sa Iloilo District Jail kag PO1 Domar Deocampo nga preso sa Police Station 1.

Gin-akusaran ni Sumodevilla si PO3 Wilfredo Tagle nga nagdikta sa iya sa paglawag sang pangalan sang mga pulis sang gindakup siya sa buy bust operation sa Rizal Estanzuela sang Mierkules sang gab-i. Ginpahayag ni Sumodevilla nga nakulbaan siya nga mabutang sa delikado ang kabuhi kon indi pagsundon si Tagle.

Gin-alegar ni Sumodevilla nga ginbanggaan lang siya sang mga pulis samtang nagasakay siya sa trisikad kag ginpasakay sa van.  Suno pa sa iya, ginlibot-libot siya kag gintabunan ang iya mga mata samtang gina-istorya ni Tagle.

Nanginwala naman si Tagle sa akusasyon ni Sumodevilla. Si Tagle ang assigned sa Police Station 1-Drug Enforcement Team pero ginrelieve kag gin-assign sa Regional Personnel Holding and Accounting Unit sang Setyembre 26.

(ATT)