(UPDATE) Father Esperidion Celis sang St. Anne Parish sa Molo, indi pa maghalin sa simbahan

Iloilo City–Nanindugan si Father Esperidion “Boy” Celis, outgoing parish priest sang St. Anne Parish nga indi siya magbiya sa simbahan sa Molo samtang wala pa sang desisyon ang pinakamataas nga korte sang simbahan sa Roma sa iya request nga indi pagsayluhon.

Suno kay Father Celis, nasaad sa kasuguan sang simbahan nga indi mahimo maka-appoint ang bishop sang bag-o nga parish priest kun nakalab-ot na sa Roma ang panawagan sang agrabyado nga pari may kaangtanan sa pagtransfer kag pagpahalin sa simbahan. Dugang niya, dapat magpahamtang man sang parochial administrator ang bishop samtang wala pa sang desisyon kag i-suspend ang pagtransfer sang natungdan nga pari.

Una na ginpahayag Father Joenick Territorio, Episcopal Vicar kag Canon lawyer nga indi pagkilalahon sang Archdiocese sang Jaro ang otoridad ni Father Celis kun magpamalibad siya sa natalana reshuffling sang mga pari. Base sa mandu ni Archbishop Angel Lagdameo, isaylo si Celis sa St. Anthony Parish sa Barotac Nuevo. Si Monsignor Maurillo Silva nga halin sa Pavia ang bag-o nga gin-assign sa Molo. (AGB)