Mas matahum nga performance sang mga tribu nga mapasakup sa Ati tribe competition sang 50th Dinagyang Festival, ginalauman

Iloilo City — Ginalauman ang mas matahum nga performance sang mga tribu nga mapasakup sa Ati tribe competition sang 50th Dinagyang Festival. Pahayag ini ni Mayor Joe Espinosa matapos nasaksihan ang performance sang 10 ka tribu sa Opening Salvo kahapon. Patilaw pa lang suno sa alkalde ang ginpakita sang mga tribu kahapon apang makita nga ginpreparahan sang mga participants ang Opening Salvo gani ginalauman sini nga mas maduagon kag matahum pa gid ang highlight.

Linibo ang nagdugok sa lima ka judging areas kag sa ruta sang parada agud makita ang tag-5 ka minuto nga choreographed dance sang kada tribu. 10 ka tribu ang mapa-indis indis agud kilalahon nga kampeon sa ika-50 nga Dinagyang Festival nga amu ang Salognon sang Jaro National High School; Paghidaet sang Lapaz National High School; Obreros sang Bo. Obrero Nsational High School; Ilonganon sang Jalandoni National High School; Dagatnon sang Ramon Avanceña National High School; Panayanon sang Iloilo City National High School, Buntatalanit sang Tiu Cho Teg Ana Ros Foundation Integrated School; Pan-ay sang Fort San Pedro National High School; Amihan sang Mandurriao National High School kag Tapaznon sang Tapaz National High School sa Capiz. (JoMaque)