Transport groups sa syudad, nagapamatuk sa pag-okupar sang mga kiosko sa guwa sang Jaro Plaza

Iloilo City— Plano sang transport groups sa syudad nga magsulat sa city council nga nagapamatok sa pag-okupar sang mga kiosko sa duha ka lanes sang dalan sa guwa sang Jaro Plaza.

Ginpahayag ni Mr. Raymundo ‘Boyet’ Parcon, presidente sang Iloilo City Loop Alliance of Jeepney Owners and Drivers Association ukon ICLAJODA nga daku ang epekto sa kita sang mga jeepney drivers ang pagsirado sa portion sang dalan. Suno sa iya, sa baylo nga pito ka trip kada adlaw, nahimu na lang nga apat ang biyahe sang mga drivers bangud sang tuman kagutok nga trapiko.

Isuhestyun ni Parcon sa City Council nga halinon ang mga kiosko sa iban nga area sa Jaro nga indi makasablag sa trapiko.

Ireklamo man ni Parcon ang kakulangan sang City government nga konsultahon ang transport groups antes ipasira ang portion sang dalan sa guwa sang Jaro Plaza. (AGB)