Konsumidor sang PECO sa Molo, nagreklamo nga ginkuha ang iya kuntador bisan nagpasugot na siya nga bayaran sang installment ang nagtimbuok niya nga billing

Iloilo City — Nagreklamo ang konsumidor sang Panay Electric Company ukon PECO nga ginkuha ang iya kuntador kag wala nagpahibalo ang electric company natuhoy diri antes ang lihok. Suno kay Lea Jacbang, 44-anyos sang Brgy. South Fundidor, Molo, Oktubre, 2017 sang nagtimbu-ok sa masobra Php 4,000 ang iya bill sa PECO. Ginpahayag Php 1,200 tubtob Php 1,300 lang ang iya average nga balayran kada bulan. Nagreklamo si Jacbang sa PECO kag ginpahayag sang representative sang electric company nga posible sala ang reading ukon billing sa iya kuntador ukon naguba ang iya digital meter. Nahisugtan naman sang magtimbang nga kampo nga bayaran ni Jacbang kada bulan sa balor nga Php 900 ang masobra Php 4,000 niya nga bill. Una nga nagbayad si Jacbang sang Php 2,000 nga downpayment angut sa ginpahayag overbilling. Magluwas diri, nagbayad man siya sugod sang Nobyembre sang kada bulan nga billing nga ginabanta Php 1,200 lakip ang Php 900 para sa installment payment. Nakibot si Jacbang nga wala siya nakabaton sang billing subong nga bulan. Nadiskubrehan na lang ni Jacbang nga wala na sila sang kuntador pagpuli sa ila balay kagab-i. Nagpamalibad si PECO Corporate Communications Officer Mikel Afzelius nga magpa-interview subong apang nagpasalig nga lantawon ang account sang tagreklamo para ma-Aksyonan. (JoMaque)