Duha ka Ilonggo seafarers, missing sa sunog sa Maersk Honam; isa pa ka Ilonggo, luwas suno sa kompaniya

Iloilo–Duha ka Ilonggo seafarers ang missing sa sunog sa Maersk Honam nga barko nga padulong sa Mediterranean.

Gin-confirmar sang John B. Lacson Foundation Maritime University sa official statement sang unibersidad nga ginpirmahan ni CEO Dr. Ronald Raymond Lacson nga tatlo ka engine cadets nila ang sakay sa barko. Ang tatlo halin sa John B. Molo kag kabahin sang cadetship program sang Maersk Line amo sanday John Rey Begaso, Janrey Genovatin kag Carl Vincent Chan.

Base sa impormasyon halin sa Maersk Line, safe na si Chan nga lakip sa 23 ka narescue samtang nagapabilin nga missing sanday Begaso kag Genovatin.

Nagkomiter ang unibersidad nga mabulig sa pamilya sang mga cadets kag nagapakig-angut man sa Maersk Line para sa updates. Nagapangamuyo man ang bilog nga university community para sa safety kag pagbalik sang mga cadets sa ila pamilya.

Samtang gin-confirmar ni Cagbang Punong Barangay kag Oton ABC President Margarito “Gary” Clavel nga tumandok sang ila barangay si Genovatin kag nagpadulong na sa Manila ang iya ginikanan agud makig-angut sa kompaniya. Suno sa punong barangay, nagapangamuyo kag nagalaum ang pamilya upod sa ila mga residente nga safe nga makita si Genovatin.

Sa website sang Maersk Line, ginpasalig naman ni CEO Soren Toft nga ginahimo nila ang tanan agud makita ang mga missing. Magluwas sa duha ka Ilonggo seafarers, missing man ang isa ka South African kag isa ka Indian Isa ang confirmado nga napatay nga taga-Thailand kag isa pa ka Pinoy ang padayon nga ginabulong sa ospital.

Marso 6 sang hapon sang natabu ang sunog sa cargo hold samtang pakadto sa Suez halin sa Singapore ang barko. (AGB)