PDEA 6 Director Wardley Getalla, wala na nasorpresa sa pagka-ulamid sang pangalan ni Bakhaw PB Remia Prevendido-Gregori sa illegal drugs

Iloilo City–Wala na nasorpresa si PDEA 6 Director Wardley Getalla nga naulamid sa illegal drugs ang pangalan ni Bakhaw, Mandurriao Punong Barangay Remia Prevendido-Gregori.

Suno kay Getalla, nag-surrender sa Oplan Tokhang si Gregori kag ginbutang sini nga drug protector siya. Nabaton na sang PDEA 6 ang impormasyon angut sa pagkadalahig ni Gregori sa illegal drugs kag magahimo sila sang validation. Kon may makita nga ebidensya ang PDEA suno kay Getalla, pasakaan nila sang kaso si Gregori.

Gin-athag naman ni Senior Inspector Kennith Bermejo, head sang Regional Drug Enforcement Unit, nga wala sang nagpilit kag Mary May Avelino nga itudlo si Gregori nga involved sa illegal drugs.

Kahapon, nagbaliskad si Avelino sa una sini nga pahayag nga naka-agi nga naghatag siya sang kita sa pagbaligya sang illegal drugs kay Gregori. Ginrason ni Avelino nga ginhambalan siya sang isa sa mga nagdakup sa iya sa buy bust operation sa Pavia nga paguwaon siya kon dalahigon ang barangay kapitan kag ang bata sini nga si Messy Gregori sa illegal drug trade. (AGB)