(UPDATE) Mga bodyguards ni STL operator Sam Aguilar, nag-ako nga nakapalupok sang pusil sang gintiro ang ila salakyan sa Tigbauan suno sa IPPO

IPPO Headquarters, Sta. Barbara, Iloilo–Nakapalupok sang armas ang mga bodyguards ni Mr. Sam Aguilar, operator sang STL Iloilo province, sang gintiro ang ila salakyan sa Barangay Buyu-an, Tigbauan sang Marso 13.

Naguwa ini sa imbestigasyon suno kay Iloilo Police Provincial Office (IPPO) Director PSSUPT Marlon Tayaba. Tatlo sa lima ka bodyguards ni Aguilar nga na-interview sang police ang nag-ako nga nakabalos sila palupok sa mga suspek. Gin-ako man sang mga bodyguards nga may tatlo sila ka pusil nga dala.

Nagahingyo si Tayaba sa iban pa nga bodyguards kag mga himata ni Aguilar agud makahatag sang paathag nga makabulig sa imbestigasyon sa natabu.

Sa Lunes, mapatawag liwat si Tayaba sang case conference upod sa Tigbauan police, intelligence units kag Criminal Investigation and Detection Group nga ginhatagan sang assignment agud magtipon sang mga ebidensya kag magpadalum imbestigar agud makilala kag mapasakaan sang kaso ang mga suspek.

Gin-confirmar ni Tayaba nga napa-enhance na ang CCTV footage sang riding-in-tandem nga ila nakuha nga posible amo ang mga suspek sa krimen. (AGB)