Cruise Tourism, igalunsar sang DOT 6 kasunod sang pagsirado sang Boracay
Iloilo City — Magalunsar sang Cruise Tourism ang Department of Tourism Region 6 kasunod sang pagsirado sang isla sang Boracay.
Ang Cruise Tourism suno kay DOT 6 Director Helen Catalbas amu ang turismo gamit ang sea and land transportation agud ma-eksperyensyahan ang nagkalain-lain nga tourist destinations kag local culture sa mga lugar nga mangin stop over sang cruise.
Bilang kabahin sang launching, magahiwat sang site inspection ang DOT 6 sa Iloilo kag Guimaras gamit ang pump boat sa Mayo 3.
Pero sa dry run sang Cruise Tourism, plano sang DOT suno kay Catalbas nga gamiton ang Boracay Express nga may carrying capacity nga 200 ka pasahero.
Igalunsar sang ahensya ang Cruise Tourism sa tion ma-validate ang mga lugar nga kadtuan, mapahibalo ang mga natungdan nga local chief executives kag mga maagyan nga komunidad nga malakip sa cruise itinerary. (JoMaque)