PSTMO, ma-implementar sang zipper lane sa mga pribado nga salakyan agud maghagan-hagan ang pagpugok sang trapiko sa pagbukas sang klase

Iloilo City — Ma-implementar sang zipper lane ang Public Safety and Transportation Management Office sa pagbukas sang klase sa Lunes sa tunga man sang nagapadayon nga mga road projects sang DPWH.

Pa-athag ni PSTMO Head Jeck Conlu, mabukas sila sang zipper lane para sa mga pribado nga salakyan sa Luna, Lapaz  sa atubang sang Lapaz Public Market kag sa iban pa nga dalanon nga iga-identify tubtob subong nga adlaw.

Ginhalimbawa sini sa Luna nga kon buksan ang zipper lane, pwede makalabay ang mga salakyan pakadto sa City Proper area. Siraduhan naman ang nasambit nga lane kon indi na gutok ang trapiko.

Ginahingyo lang ni Conlu ang mga drivers nga sundon ang itudlo sang ila mga personnel agud malikawan ang dugang nga pagutok sang trapiko. (JoMaque)