House Speaker Pantaleon Alvarez, maabot sa Iloilo agud magpasumpa sa bag-o napilian nga mga barangay kapitan

Iloilo–Maabot sa Iloilo si House Speaker Pantaleon Alvarez agud pangunahan ang pagsumpa sang mga bag-o napilian nga barangay kapitan.

Ginconfirmar ni Governor Arthur Defensor nga nahisugtan sang mga kongresista sa syudad, first, second kag third district nga tingub nga magsumpa ang mga barangay kapitan nga nagdaug sa ila distrito sa Hunyo 24. Sapulon naman ni 5th district Congressman Raul ‘Boboy’ Tupas ang mga alkalde sa distrito kon maga-upod man sa oath-taking.

Gin-ako ni Defensor nga wala na gin-imbitar ang taga-4th District bangud nauna na gin-anunsyar ni Cong. Ferj Biron nga mapadalagan siya nga gobernador sa 2019 elections.

Gin-athag sang gobernador nga wala sang pilitay ang pagtambung sang mga barangay kapitan. Dugang ni Defensor, indi man pagsumpa sa PDP-Laban ang himuon kundi oath-taking sang mga nagdaug sa bag-o lang natapos nga barangay elections. (AGB)