Pulis, gintiro sang riding-in-tandem sa Arevalo; isa pa gid ka pulis nga natiruhan, gindala man sa ospital pila ka minutos matapos ang shooting incident sa Arevalo

Arevalo, Iloilo City — Pilason ang pulis nga gintiro sang riding in tandem sa Dulonan, Arevalo mga alas-4:30 kahapon sang hapon.

May pilas sa wala nga abaga si PO1 Dorben Acap Jr alyas Benjo, 30 anyos sang Mohon, Arevalo, kag padayon nga ginabulong sa The Medical City. Suno sa isa sa mga nakakita, nagtupad ang nagasunod nga motorsiklo sa driver’s seat sang pula nga awto nga ginamaneho ni PO1 Acap kag gintiro ang pulis. Nakabalos suno sa testigo ang pulis sang nag-overtake ang motorsiklo kag nagkadto sa tuo nga parte sang salakyan apang natumba sa kilid sang dalan.

Ginconfirmar naman ni Senior Supt. Martin Defensor, head sang Regional Headquarters Support Group nga assign sa iya si Acap. Bag-o lang suno sa iya nakatapos duty ang pulis kag pauli na sang iya nabalitaan nga gintiro ini.

Pulis ang pilason nga gindala sa Western Visayas Medical Center pila lang ka minutos matapos gintiro sang riding-in-tandem si PO1 Dorben Acap Jr alyas Benjo sa Dulonan, Arevalo.

Gin-identify ni Senior Inspector Mary Grace Borio, hepe sang Arevalo Police Station, ang pilason kay PO2 Melvin Mocorro. Apang wala pa sang ihibalo si Borio kon diin na-assign si PO2 Mocorro nga may pilas sa tiil kag likod.

Ginapa-imbestigaran suno kay Borio kon involved si PO2 Mocorro sa pagtiro kay PO1 Acap apang kon maconfirmar, mahimo nga may away ang duha ka pulis gani nga nagtiruhay.  Base sa hospital record, gintiro si Mocorro sa Pakiad, Oton mga alas-4:55 sang hapon. Apang sa pagcheck sang Aksyon Radyo sa Oton police, wala sang ginreport nga shooting incident sa Pakiad. (JoMaque)