(UPDATE) Mahindra Enforcer Patrol nga ginhatag sa Leon, Estancia kag Oton Police Stations, madasig nga maguba suno sa mga hepe

Iloil0–Madasig nga maguba ang mga Mahindra Enforcer patrol cars nga ginhatag sa Leon, Estancia kag Oton Municipal Police Stations.

Suno kay Chief Inspector Cyril Octavio sang Leon Police Station, makapila ka beses nga nagabalik-balik sa talyer ang ila Mahindra patrol bangud masami nga nagakaguba.

Indi man dali-dali suno sa iya nga ma-repair ang patrol bangud maiwat ang spare parts kag kinahanglan pa nga i-request sa India.

Suno naman kay Chief Inspector Jonah Galicha sang Estancia Police Station, naka-garahe subong sa atubang sang ila munisipyo ang Mahindra patrol bangud guba ang preno pero ginapangitaan nila sang paagi nga mabaklan sang piyesa.

Una suno sa iya nga nag-bisyo ang Mahindra patrol sang barangay elections gani ila ginpakay-o apang liwat nga nagbisyo.

Ginpahayag naman ni Chief Inspector Gervenson Moyo sang Oton Police Station nga nakaagi man guba ang ila Mahindra patrol kag wala nila nagamit sang isa ka bulan. Sa subong, serviceable na ang patrol matapos napainan sang pundo sang local government unit kag napakay-o. (AGB)