(UPDATE) Panday nga gintiro sa Oton, napatay samtang ginabulong sa ospital
Oton, Iloilo–Napatay samtang ginabulong sa ospital alas 6 kagab-i, Hulyo 27, ang panday nga gintiro sa videokehan sa Poblacion South, Oton sang Hulyo 26 sang gab-i.
Ginkumpirmar ni Chief Inspector Gervinson Moyo, hepe sang Oton Police Station nga napatay si William Panuncio nga gintiro ni Jobert Jolampong, empleyado sa SB office sa Oton bangud sang pilas sa iya tiyan.
Preso si Jolampong nga nagsurrender sa police.
Base sa pagpangusisa sang Oton police, ginpahayag nga naakig si Jolampong sang nakita nga gina-ihian sang biktima ang iya salakyan.
Nagtapungulay pa ang duha antes natiruhan ni Jolampong si Panuncio.
Ginpahayag pa sang police nga may daan nga hiligut-anon ang duha. Desidido ang pamilya nga magpasaka sang kaso nga murder batuk kay Jolampong. (AGB)