Suspek sa brutal nga pagpatay sa iya anay nobya sa Jordan, Guimaras, nag-ako sa krimen; Suspek, nagpanghiwala nga ginhimuslan niya ang biktima
Jordan, Guimaras –(UPDATE) Gin ako ni Antonio Mallorca, 23 anyos, nga ginpatay niya ang iya anay nobya sa Brgy. Alibhon sang Agosto 2.
Ini suno kay Police Senior Inspector Karl Stephenlee Betansos, hepe sang Jordan Municipal Police Station.
Suno kay Mallorca, palangga gid niya ang iya anay nobya nga si Emelyn Ganancial, 23-anyos sang Sitio Igbantang, Sta. Teresa, Jordan, sugod sang first year college pa lang siya.
Sang ginpamangkot kun naghinulsol sa ginhimo, nagtangu tango ang suspetsado.
No comment naman si Mallorca sa iban pa nga pamangkot sang Aksyon Radyo kag nagpahayag nga sabton na lang niya tanan sa korte.
Suno naman sa iloy sang suspetsado nga si Felicidad, base sa pag istorya sang iya bata, una siya nga ginlampusan sang bato sang biktima rason nga nagpalangdulom ang iya panulukan kag nagbalos man lampos sang bato kay Ganancial.
Dugang niya, wala man ginlugos sang iya bata ang biktima.
Naluslos ang underwear sang biktima suno sa suspect matapos niya ini ginyudyod. (JoMaque)