(UPDATE) Ex-boyfriend, naghinulsol sa pagpatay sa iya anay nobya nga nasapwan sa kasiutan sa Jordan, Guimaras

Jordan, Guimaras–Naghinulsol ang suspek sa pagpatay sa iya anay nobya sa Jordan, Guimaras.

Ginpanindugan ni Antonio Mallorca, 23 anyos sang Brgy. Dasal, Sibunag, Guimaras nga palangga niya si Emilyn Ganancial, 23 anyos sang Sitio Igbantang, Brgy. Sta Teresa, Jordan kag luyag niya ini nga balikan.

Apang wala nagpasugot suno sa iya ang biktima tubtub nga nagresulta sa brutal niya nga pagpatay sa anay nobya.

Suno kay PSI Karl Stephenlee Betansos, hepe sang jordan police station, nagsugtanay ang duha nga makit-anay sa daan nga dumpsite sa Brgy. Alibhon, Jordan agud mag-istoryahanay angut sa ila relasyon.

Sa version ni Mallorca, gintuyo sini hakson ang biktima apang nagbalibad ang dalaga kag ginlampusan pa siya sang bato. Suno naman sa iloy sang suspek nga si Felicidad Mallorca, ginsugid sang iya bata nga una siya nga ginlampusan sang bato sang biktima rason nga nagpalangdulom ang iya panulukan kag nagbalos man lampos sang bato kay Ganancial tubtub nga mapatay.

Suno pa sa iloy, nanginwala ang iya bata nga ginhimuslan sini ang biktima. Naluslos suno sa iya ang underwear sang biktima matapos ini ginyudyod sang suspek.

Base naman sa pag-autopsy ni Dr. Owen Lebaquin, medico legal officer sang PRO 6 Crime Laboratory, napatay si Ganancial bangud sang multiple traumatic injury sa ulo. May patimaan man suno kay Lebaquin sang sexual abuse sa kinatawo sang biktima. (AGB)