(UPDATE) Amay nga nagtiro patay sa iya bata sa Maasin, napuno na bangud sa ginpahayag wala pagtaha sang biktima sa iya nga mga ginikanan; asawa sang biktima, wala na sang plano nga kasuhan ang iya ugangan

Maasin, Iloilo–Wala gataha kag nagabato pa ginikanan ang panday nga gintiro patay sang iya amay sa Barangay Siwalo kagab-i, Agosto 12.

Suno sa amay nga si Eduardo Miranda, 64 anyos, napuno na siya sa pagka-abusador sang iya bata nga si Felimon Miranda, 37 anyos.

Soltero pa lang suno sa iya ang biktima, wala na ini nagataha sa ila sang iya asawa. Samtang sang nakapangasawa na, asawa naman sini kag kabataan ang ginapa-ukpan kon mahubog.

Antes ang insidente, ginhambalan pa sang suspek ang biktima nga magpauli bangud nga hubog kag naga-eskandalo samtang nagapanghaboy sang bato sa ila balay.

Wala naman ini sang ideya nga may kalain sang buot sa iya ang biktima.

Ginpahayag ni Mrs. Nelia Miranda, asawa sang napatay, nga may hibubun-ot sa ginikanan ang iya bana. Ini ang rason kun ngaa ginapa-upok sang iya bana sa iya kag sa ila kabataan ang kaugot sini sa ginikanan kon mahubog.

Ginpahayag ni Nelia nga nakapanugid sa iya ang bana nga may pinilian ang ginikanan sini kag ginapasulabi ang iban niya nga utod.

Wala naman sang plano si Nelia nga kasuhan ang iya ugangan apang nagahingyo nga buligan siya sa pagpadakup sa apat nila ka kabataan sang biktima. (AGB)