Lambunao National High School, aga pa nga napuhag matapos nasapwan ang ginapatihan improvised explosive device sa CR sang mga babaye

Lambunao, Iloilo–Napuhag ang mga estudyante, faculty kag staff sang Lambunao National High School matapos nasapwan sa CR sang mga babaye ang ginapatihan improvised explosive device ukon IED kaina ang aga, Agosto 28.

Suno kay Chief Inspector Jogen Suegay, hepe sang Lambunao Police Station, nasulod sa pink nga paper bag ang ginapatihan nga explosive gani gilayon nga gintawgan sang taga-Explosive and Ordnance Division. Temporaryo nga ginbakante ang area samtang nag-imbestigar ang bomb squad sang Police Regional Office 6 sa pagpamuno ni Senior Inspector Hernan Bacalangco kag K-9 unit.

Natukiban nga bomb replica ang nakita nga human sa tatlo ka card board tube nga ginpuno sang balas, ginhigtan sang tie wire kag ginbutangan sang circuit board kag cellular phone battery.

Gina-imbestigaran na kon sin-o ang naghimo sang bomb replica kag nagbilin sini sa eskwelahan. (AGB)