HVT drug personality sa listahan sang Provincial Drug Enforcement Unit, patay sa buy bust operation sa Pavia

Pavia, Iloilo–Patay ang subject sang drug buy bust operation sa Zone 2 Ungka 2, Pavia kaina sang hapon, Agosto 29.

Ginkilala ang subject kay Richard Gregori, 41 anyos, nga ara sa watchlist sang Pavia police suno sa hepe nga si Chief Inspector Fernan Limbungan.

Suno naman kay Chief Inspector Jonathan Pinuela, team leader sang Provincial Drug Enforcement Unit, dakpon na kuntani sang pulis nga poseur-buyer si Gregori sang ginpahayag nga nagabot ini sang pusil gani nga gin-unahan na lang tiro.

Gindala sa Western Visayas Medical Center si Gregori apang suno kay Ungka 2, Pavia Tanod Commander Bongbong Amaquin, gindeklarar ini nga dead-on-arrival sang doktor. Nakita ni Amaquin nga may duha ka pilas sa likod kag isa sa wala ka butkon si Gregori.

Si Gregori suno kay Chief Inspector Limbungan, pakaisa ni Peter Paul Gregori nga gindakup sa raid sang Pavia police sang Agosto 14 subong nga tuig kag nakuhaan sang duha ka pusil, mga bala kag 25 ka sachets sang shabu.

Nagbalibad nga maghatag sang pahayag ang pamilya ni Gregori. (AGB)